br23 - два бакі аднаго блогера

Мой юніёрскі (перадапошні) і сэньёрскі (апошні) гады навучаньня ва ўнівэры былі адзначаныя тым, што ў мяне выкладаў адразу тры ці чатыры кампутаровыя курсы адзін і той-жа брытанскі прафэсар Джон Ґалетлі.

Сярод гэтых курсаў быў адзін вельмі цікавы і ня надта “навукаёмісты” CS485 Multimedia, на якім мы проста знаёміліся і гуляліся на пачатковым узроўні з PowerPoint, Photoshop, HTML і Flash, VRML, Corel Draw, 3D Studio Max, SoundForge. Сапраўдная мара для перагружанага студэнта інфарматыкі.

Вялізны плюс гэтага прадмета палягаў яшчэ і ў тым, што мы, студэнты CS485, атрымвалі неабмежаваны доступ да мультымэдыйнай лябараторыі. Кожнаму з нас даваўся ключ да лабы, і ў нас зьявіліся сэмі-пэрсанальныя кампутары, прычым вельмі добрыя на той час. На сваім сэмі-пэрсанальным я паставіў шпалеры зь вялізнай фоткай Мірскага замку — паўднёва-заходняй вежы. Аднойчы прафэсар Ґалетлі, праходзячы міма майго компа, спытаўся:

— Гэта Кэмбрыдж?

— No, sir, it’s Mir castle in Belarus.

— Выглядае рыхтык як Кэмбрыдж.

Камплімэнт Радзівілам ад брытанскага джэнтэльмэна? Аднак адразу зьявілася думка: ці гэта праўда, і ці ёсьць там нешта падобнае? Шукаючы на сайце з фоткамі Кэмбрыджа (cambridge2000.com), пакуль нічога падобнага да Міру не знайшоў, але-ж тым тысячы прыгожых здымкаў, а я праглядзеў мо якую сотню. Бальшыня зь іх, па праўдзе, хоць і ўражваюць сваёй прыгажосьцю і духам даўніны, але ані каліўца не нагадваюць Мір. Ну хіба толькі вось гэтая невялікая вежа на Pembroke College Red Buildings сваёй формай і колерам напамінае паўднёва-заходнюю вежу Мірскага замку.

This entry was posted on Thursday, September 8th, 2005 at 11:58 am and is filed under тэхналёгіі, Беларусь, асабістыя. You can follow any responses to this entry through the RSS 2.0 feed. You can leave a response, or trackback from your own site.