br23 - два бакі аднаго блогера

Даўно хацеў напісаць пару словаў пра адзін апазыцыйны навіновы вэбсайт, а сяньня якраз зьявілася чарговая нагода.

Выкраданьне чужых навінаў

Па-першае, вельмі непрыемна і непрафэсійна выглядае тое, што яны крадуць навіны з усяго беларускага і расейскага сеціва, не пазначаючы першакрыніцы. Гэта на іхнай мове эўфэмізмаў называецца “дайджэст”. На маю думку, гэта проста вельмі не прафэсійна. Па-другое, гэта вельмі ня зручна, калі хочацца адсачыць “сьляды” навіны ці праверыць якасьць перакладу з мовы арыгіналу.

Калі я пасылаў ім заўвагі на гэты конт, то атрымліваў адпіскі накшталт гэтай (канечне ж, па-расейску):

“Я очень уважаю коллектив Вашего [СМИ] и у меня нет совершенно никакого желания идти на конфликт с Вами, но все же, позвольте, мне опять не согласиться с Вами. Во всем белорусском интернете ни один ресурс при активном использовании материалов Вашего сайта не использует подобную ссылку. Обвинять же меня в нарушении авторских прав на основании того, что я использую Вашу информацию, меняя форму подачи материалы, но проставляя ссылку — совершенно не стоит. Это общепринятая практика и я не думаю, что здесь стоит доходить до обсуждения базовых принципов теории журналистики (sic!)”

Прапаганда і непраўдзівая інфармацыя

Па-другое, на іхным сайце адсутнічае рэдактарскі кантроль за праўдзівасьцю і аб’ектыўнасьцю навінаў.

Вельмі часта на сайце зьяўляецца тэндэнцыйная інфармацыя яўна прапагандысцкага характару, у стылі “усё ў лукашэнкаўскай Беларусі дрэнна, а на Захадзе і сярод апазыцыі ўсё проста супэр”.

Зьяўляецца і непраўдзівая інфармацыя. Напрыклад, вельмі добра мне запомніўся дзень 28 верасьня 2004 году. У іх цэлы дзень у якасьці галоўнай навіны вісела інфармацыя аб тым, што “ЗША забараніла выдачу візаў Шэйману, Навумаву, Паўлічэнка і Сівакову”. Насамрэч, ЗША гэтага не рабіла. Забарону ўвёў Эўрапейскі Зьвяз, а Дзярждэпартамэнт адно толькі “прывітаў” гэтае рашэньне эўрапейцаў.

Ну і, нарэшце, сяньня ў іх на сайце зьявіўся матэрыял — пераклад з блог-дзёньніка аднаго вядомага брытанскага рок-музыканта — пра тое, як іхны рок-гурт прымалі ў Беларусі.

Я за дзьве хвіліны знайшоў англамоўны арыгінал гэтага блогавага запісу ў Гугле. Аказваецца, гэты запіс у блогу быў зроблены… 14 лістапада, 2000 году. Больш як пяць гадоў таму (!).

***

Чарговы disclaimer: гэта я не пра палітыку, а пра элемэнтарны прафэсіяналізм і журналісцкую этыку. Я — за свабоду СМІ, за пашырэньне беларускай інфармацыйнай прасторы, за права на вольнае і неабмежаванае атрыманьне інфармацыі. Але-ж сваю справу трэба рабіць прафэсійна.

This entry was posted on Tuesday, December 13th, 2005 at 6:02 pm and is filed under беларускія падзеі, блогінг. You can follow any responses to this entry through the RSS 2.0 feed. You can leave a response, or trackback from your own site.