“Газпром”, Шрэдэр і “Наша Ніва”
У англамоўнай частцы дзёньніка я на гэтым тыдні неаднойчы зьвяртаўся да тэмы “Газпрому”. Тут я не пісаў пра гэта, бо не было часу перакладаць з ангельскай, украінскай і расейскай усю тую цікавую і часам супярэчлівую інфармацыю пра газавыя спрэчкі. Але вось жа журналіст “Нашай Нівы” Алесь Кудрыцкі, які цяпер знаходзіцца ў сталіцы Белай Галяндыі Бэрліне, напісаў пра Герхарда Шрэдэра рыхтык тое, што я хацеў напісаць сам пра гэтага лепшага камарада галоўнага расейскага кагэбэшніка…
• Злавесны цень Шродэра над газавым канфліктам:
Пра што думаў экс-канцлер, абдымаючыся з Пуціным бяз гальштукаў ды плянуючы газавы гешэфт — пра краіну ці пра пэнсію? Калі Шродэр нават на градус зьмяніў палітычны курс краіны ва ўласных мэтах, для немцаў як эўрапейскай нацыі гэта непрымальна. «Палітычнае маўчаньне ў адносінах да Расеі акупілася для сп.Шродэра фінансава», — зьедліва адзначыў кіраўнік партыі зялёных Райнгард Бютыкофэр. Новая пасада — гэта «грошы за маўчаньне пра генацыд у Чачэніі і паступовае задушэньне свабоды ў Расеі», — кажа Бэрнт Посэльт, эўрадэпутат ад партыі ХСС. Шродэра не ўхвалілі нават аднапартыйцы. «Я б так не зрабіў», — сказаў віцэ-прэзыдэнт Бундэстагу Вольфганг Тырзэ ў інтэрвію тэлеканалу ARD. Адным сваім крокам Шродэр кінуў цень на сябе самога, на адзін з найбуйнейшых у эўрапейскай гісторыі энэргетычных праектаў, а таксама на ўсю нямецкую ўсходнюю палітыку апошніх гадоў.
Шродэр прыдбаў сабе цёплае месьцейка, але пахне яно непрыемна. Кіраўнічым дырэктарам Паўночнаэўрапейскага газаправоду прызначаны Матыяс Варніг, кіраўнік прадстаўніцтва Дрэздэнскага банку ў Расеі. Пікантнасьць сытуацыі ў тым, што, паводле афіцыйных зьвестак, Варніг у 1970-х — 1980-х «працаваў штазі», даслужыўшыся да чыну маёра. Як старшыні камітэту акцыянэраў Шродэру не пазьбегнуць цеснага супрацоўніцтва з Варнігам.
У дадатак да ўсяго, газаправод зарэгістраваны не ў Расеі і не ў Нямеччыне, а ў швайцарскім кантоне Цуг, сусьветна вядомай афшорнай зоне. Інакш кажучы, структура, якая будзе забясьпечваць газам Нямечыну і ў якой будзе працаваць яе былы канцлер, ня дужа прагне плаціць падаткі. Дадайце да гэтага новае амплюа «Газпрому» як газавага душыцеля новых эўрапейскіх дэмакратыяў.
Далей варта зьвярнуць увагу на артыкул
• Ці бел- «…трансгаз»? — у недзяржаўных СМІ шырока абмяркоўваецца магчымасьць таго, што ў Сочы Лукашэнка здаў “Белтрансгаз” расейцам, і такім чынам забясьпечыў танны газ і падтрымку на трэці тэрмін. Выглядае праўдападобна.
І апошняе, зьвярніце ўвагу на “50 радкоў рэдактара” (хоць і занадта патэтычная, але па зьмесьце вельмі правільная) і на гэты заклік да ахвяраваньняў, у тым ліку ад тых, хто зьбіраецца чытаць “Нашу Ніву” праз інтэрнэт.
Я асабіста ахвяраваў невялікую суму ў далярах, якую перадаў у рэдакцыю NN мой калега. Гэта першая ў гісторыі беларуская газэта, якой сёлета спаўняецца 100 гадоў. Трэба падтрымаць яе ў гэты цяжкі год.
January 7th, 2006 at 6:21 pm
Матыяс Варніг у 1970-х — 1980-х як агент выведкі ГДР Штазі працаваў у шчыльным супрацоўніцтве з Уладзімірам Пуціным, у той час супрацоўнікам рэзыдэнтуры КГБ СССР ва ўсходнім Бэрліне.